||
□ 李永源 “僆模”，即系少女模特、嫩模。外省人普遍唔明，香港人则至熟悉，因为呢个词系佢哋前几年发明嘅(所以佢哋有权周不时写成“囗靓模”)。其次系广东人———查实呢个“僆”字，我哋从“咸丰年代”到而家成日挂喺嘴上。 “僆仔”、“僆女”，即后生仔女。“僆妹仔”，系较为随和嘅称呼：“僆妹仔，呢件衫点卖啊？”对象系特别后生嘅女仔。而“花僆仔”、“花僆女”，系指睇起嚟带啲花巧嘅少男少女。多咗个“花”似有少少贬义，所以一般唔会当面叫。 “僆仔头”，除咗相当于“僆仔当中嘅阿头”，重有另一样意思，即性格特征好似僆仔，但实质上并唔年轻嘅男人。譬如话：“一把年纪重咁贪玩，成个僆仔头噉。” “做僆”、“你条僆”，含义就至得意嘞———佢无关年纪，却有关资格。“做僆”(亦叫做僆仔)，即做细、做人手下；“你条僆”，即“你那个手下”。不过呢种叫法用喺白领方面较少，用喺蓝领方面、尤其系“捞偏”方面较多。僆嘅“领导”叫做大佬。嗱，香港警匪片硬系听到啲大佬话：“你条僆好串噃！”啲“做僆”嘅又话：“我哋听大佬嘅！” 有咁多种“僆”，唔知你做过边种？ |
