||
□ 吴成
暑期参团包食宿两日游，餐标八菜一汤白饭任装。够钟埋位，汤餸上齐，各自起筷。后生哥胃口好，三五埋堆风卷残云，食完赶住开发余兴节目；小资群体讲究食相，温良恭俭让，食得慢净白饭，又不屑“汁都捞埋”，就预咗系清茶淡饭咯。
临时饭局，柴娃娃，无伤大雅。若餐餐咁乱龙，肯定唔掂。故此，坊间父老教落：“同枱食饭，各自修行。”而书塾教材、广府版本嘅《弟子规》则更郑重其事，“同枱食饭，手踭勿横。餐前饮汤，让人头啖。汤入口时，勿发声谈。夹面前餸，瞅空落箸。好丑勿论，顺手夹起。扒饭一啖，夹餸一箸。连夹几次，就是失仪。”对于这种大箸猛夹，食过隔篱嘅失仪行为，广州俗称“大餸”，并多将此类吃货标签为赵匡胤。何解？因为粤语中餸、宋同音，于是应运而生了哩一句歇后语：赵匡胤———大宋(餸)王。
虽然谑而不虐，但一位全枱人公认嘅“赵匡胤”却H O LD不住嘞，竟然反怨肴稀菜薄，饭未终席就先光盘，非关“大餸”蚕食，实因分量缩水，并疑及买餸“打斧头”。莫非厨房出了个忽必烈？食客们瞬间O晒嘴。呢嗰忽必烈，乃元朝开国皇帝，一代天骄成吉思汗嗰孙，好战嘅蒙古大汗，斧头马上出政权，心狠手辣，专业是“吞金灭宋”。故这侵吞菜金、缩减送餸量嘅下作，旧时就用这位暴君来隐喻嘅。
实在系“躺着中枪”，今回轮到采购员喊苦喊屈嘞：餐餐“买餸钱”得鸡嗉咁多，物价又日日升，老细总唔升伙食费，大家冇啖好食，唔关赖“大宋之王”赵匡胤、“吞金灭宋”忽必烈。怪只怪老细太过分，简直是：皇帝甩棉裤———孤交寒！你懂的。
