||
论尽母语
□ 冬日恩宁
日前，我喺某餐厅用膳，后面传嚟一把女声：“靓女，你一阵得手唔该畀啲醋我。”我知一定系客人对服务员讲嘅，而家服务员统称“靓女”，同容貌无关。“你要乜嘢话？”“靓女”识粤语，不过就听唔明。“醋呀！”另一把女声好大声恶狠狠回答。“哦，你等一阵。”呢次“靓女”明白晒。我转头一望，两个五十几岁师奶正在食面。心谂：我冇估错，识得讲“得手”，唔会后生。
“得手”，旧时粤人讲得多，而家冇人明白，以为系坏人成功做坏事嘅意思，即系“得逞”。其实旧日仲有一层意思系“得闲”。听到有人讲“得手”固然亲切，最感触仲系旧日粤人待人接物嘅态度，竟然仲喺度。乜嘢态度？就系尊重人嘅态度。“靓女，你一阵得手唔该畀啲醋我。”言外之意就系：我想麻烦你一件小事，唔急，你得闲先帮我。听落唔系使人做嘢，分明系求人。旧时大家习惯以呢种态度待人，一方面，对方感觉受尊重，会更加尊重你；另一方面，你识礼貌，有教养，被人感觉就系个有地位嘅人，呢种人最着数，往往更容易获得优质服务。
“得手”其实就系“等我腾出只手先啦”嘅简单表达。言外之意系：我而家好忙。今时今日使人做嘢，冇人会客气，多数系直接呼喝。“金钱挂帅”导致“客人大晒”成为共识，我畀钱，要求最好服务，理所当然，唔使畀面任何人，理你“得手”“唔得手”，迟啲都唔得。而“得手”而家净系得番“得逞”嘅意思。即系，只有坏人先讲“得手”，比如成功打咗人哋荷包，就叫“得手”。而好人见到咋睇唔到，点解唔出声？佢话“冇咁得闲”。
