|
| 整饼猜呈寻 |
街坊话事 □ 王婉芳 乐叔：哗，咁人齐啊。十足十挨年近晚炸油角嗰种气氛啵。 兰姨：咩风吹你嚟啊？阿乐。啱晒，我哋全家喺度整紧月饼，放咗入烤箱口架啦，你嚟做评判。 乐叔：睇嚟我真系好食神、好口福呐。 小柔：乐叔味觉灵敏、品味一流，重阉尖过蔡澜，嗌你做美食指导就最合适不过啦。 乐叔：我净系识食口架咋。你哋一个二个都系巧手、妙手，又有阿兰呢个技术总监坐镇，成个美女厨房组合噉样，完全掂当啦。 兰姨：主要系佢哋姑嫂有兴趣搞，材料新鲜唔再讲，重可以齐齐喐手，猜呈寻定落嚟边个搓粉、边个整馅，大家有讲有笑、联络感情，啲细路仔围住张台氹氹转搞搞震，几开心啊。 乐叔：人哋阿茂整饼，冇嗰样整嗰样；你哋系叻过阿茂，冇嗰样整嗰样，得！有嗰样整嗰样，更加得！咁多动物图案模具、咁多花款，啱晒细路哥心意啦，真系够晒有心思、有创意啊。 小柔：乐叔，新鲜出炉嘅月饼，试下我哋啲手势，畀啲意见。 乐叔：冇得顶！好食到唔停得口。冰皮都识整，真系掂过碌蔗。 兰姨：你把口真系识氹人嘅啫。麻麻哋噉啦。 乐叔：你估我随便赞人嘅咩？真系食过返寻味喔，正！ 小柔：多谢赞赏！美食专家讲嘅嘢，我信口架。说明我哋啲水准得得哋，有改进潜质咯！ |
