|
永不剿皮
广州随笔
□ 王婉芳
年龄系大多数女人嘅死穴。边个唔识趣、问亲“今年贵庚”就触犯禁区嘎啦，唔想乞人憎，就千祈咪喺佢哋面前提以下呢啲敏感字眼咯。一只字系“老、残、黄、斑”，两只字系“剿皮”，三只字系“更年期”。正因为噉样，难怪而家见面打招呼，惯例就系：对住女嘅，无论从3岁到93岁，人人都嗌靓女，永远冇错嘅。
许冠杰有首歌叫《十个女仔》，就将女人唔服老嘅微妙心态表现得淋漓尽致。歌词系“十个女仔，九个认细，明明系老，佢话唔系。三张几嘢，扎起辫仔，青春美丽，就冇失礼。十个女仔，九个浪费，时时换季，已系成例。身光颈靓，衬起好睇，钱乱甘FIN G，为顾身世……”歌词将女人心思描述得超准确，真系够晒生动形象啊。女人一旦上年纪，就想拼命抓住青春，难以接受日渐衰老嘅残酷现实，好在乎好在乎自己喺人哋心目中嘅形象，想方设法都要装嫩。就好似嗰个笑话讲嘅噉样：“前面睇上去十八岁，后面睇上去十六岁，上面睇上去二十岁，估计实际年龄系三个数加埋嗰度弊呢。”享受畀人呃畀人氹嘅女人，真系搞死怪。
近牌同事当中有人向女士献殷勤，最钟意卖口乖话祝人哋“永不剿皮”，赞到啲靓女都唔知几受落。我一听，个心打咗个突：吓？好心定恶意嘎？永不剿皮咪即系定咗型？除非系木乃伊啦。
