鬭木 （转帖）

论尽母语

□Highyun

“斗”字有两个读音，一个系“北斗星”嘅“斗”，一个系“战斗”嘅“斗”。汉字简化之前，系两个字：“北斗星”，“战鬥”。

“鬥”重有异体字：“鬪”同“鬭”。相信好多人对“鬪”字唔会陌生，因为佢哋系睇住“聖鬪士星矢”大嘅一代。至于“鬭”，就大有文章喇。从造字法睇，“鬥”嘅甲骨文字形好似两个人打交咁样，而“鬭”同打交无关，拆开入边个“斲”(读[doek3啄])，右边系“斤”，古时表示斧头。《韩非子·五蠹》有“采椽不斲”，《礼记·檀弓上》有“木不成斲”，其中“斲”都系“砍、削”之意。“斲”表意，“鬥”表声，所以，唔系“斗木”，亦唔系“逗木”，系“鬭木”。

《说文解字》里头，“鬬”有“接合、拼接”嘅意思，引申为“木石镶嵌合缝之处”。可见，“鬭木”唔单单系劈开块木咁简单，更重要嘅系裁割加工各种木料，并接合成木器。“鬭”出嚟嘅嘢，好考工夫，“鬭木佬”系甚为受人尊敬嘅职业。历史上最出名嘅鬭木佬，大号叫鲁班，后世都奉佢为木匠宗师。

时至今日，鬭木手艺逐渐被批量出产木器产品嘅工厂取代，“鬭木佬”三个字越嚟越少人讲，取而代之嘅系“木工”。而“鬭”嘅用法亦有咗新发展，更常用于其他场合，表示用好多心思“砌”出某件作品，例如“鬬好个模型(从零散嘅部件砌好完整模型)”、“鬭篇论文出嚟(从一堆文字资料整理成一篇论文)”等等。

有人认为“剫木”先至系正确写法，佢哋嘅根据系《尔雅·释器》入边有句“木谓之剫”(将木材加工裁割)。意思就近磅，之不过读音就争得远，读同度。如果要从两个拣一个，我会拣“鬬”，因为一件事情，用得“鬬”字形容嘅都需要好多时间，唔马虎得。“鬬”字嘅结构更严谨，需要慢慢“鬬”个字出嚟，本身就体现咗中华文化嘅精巧细致。

笔顺：横横竖横竖 横横竖横竖 竖横折横折竖折横折横竖横撇撇横竖