||
Highyun
有次同朋友出去食饭，朋友同个侍应讲“帮手倒茶”，个侍应攞咗佢杯茶去倒，跟住过嚟问佢想饮咩饮品。朋友话：“我净系想饮茶，唔想饮其他嘢，你做乜倒咗我杯茶！”谂真啲，我朋友都有责任。佢做乜讲“倒茶”呢？究竟系倒咗杯茶佢，抑或倒啲茶入只杯度？查实，广府话可以好完美解决呢个问题：要倒走杯入面嘅茶，就讲“倒茶”，要向杯中加茶，就讲“斟茶”。
早喺酒风盛行嘅春秋战国年代，“斟”经已广泛使用。《韩非子.外储说左上》有：“宋人有少者，亦欲效善，见长者饮无余，非斟酒饮也，而欲尽之。”意思系话，一杯酒唔饮清佢就唔斟酒，噉先有衣食。到唐朝，冇酒就冇灵感嘅李白都成日用个“斟”，例如《杂曲歌辞.悲歌》就有“悲来乎，悲来乎，主人有酒且莫斟，听我一曲悲来吟”，一副借酒消愁嘅型格。明清小说四大名著，都唔少得酒呢样嘢，故此必定见“斟”字，例如《红楼梦》呢句：“宝玉先禁不住，拿起壶来斟了一杯，一口饮尽。”可见，即使到咗清朝，北方话依然好常用“斟”字，但到今日，却被贬为广东“方言”。
“斟”系向容器内慢慢注入液体，起初，最需要“斟”嘅系酒，而斟酒嘅动作系用个斗倒入酒杯嘅，所以以“斗”为形旁。“斟”有文化底蕴，要慢慢斟，但时下斗酒风气盛行，“斟”经已唔够豪气，要“倒”先够霸气。至于茶呢，重保留到少少温文尔雅嘅风气，所以现时“斟茶”比“斟酒”更常见。
“斟”常与“酌”连用，“酌”就系饮酒。两个人斟完就酌，酌完就斟，肯定系好多偈倾。广府话有句话叫“摸住酒杯底慢慢倾”，查实就系“斟酌”。“斟酌”讲讲下就缩略成“斟”。当然，倾偈唔一定要饮酒，去茶楼一样倾得，一盅两件，密密斟茶，同班老友“密密斟”、“慢慢斟”，都几写意。细细声嘅“斟”，同大大声嘅“侃”，算唔算系文化差异？
