||
粤讲粤俗
□ 晴天兰心
有个懒散嘅学生，经常都唔交功课。呢种情况下，唯有见家长沟通一下。
学生嘅爸爸系个地道老广，讲起自己个仔嘅“懒”，佢啲广州话俗语系一句接一句：有通俗嘅“大食懒”，有常用但唔知点解嘅“懒到出汁”、“懒到出骨”，更有唔太文雅嘅“屙屎懒除裤”……
自古以来，中国人就将勤劳睇做系人嘅重要优点。一个人哪怕系好蠢，但只要够勤力，亦会有将勤补拙嘅机会，笨鸟先飞就系呢个道理。反而系個啲懒人，就算几聪明、几识得走精面，但只要同“懒”字挂钩，就一定会畀人鄙视。我哋嘅父辈从细就通过各种方式将呢啲道理教畀我哋知，其中包括咗童谣。
珠三角有一种风俗叫“卖懒”，顾名思义系要将“懒惰”卖甩。农历年三十晚，细佬哥会一边攞住灯笼，一边沿街唱童谣：卖懒，卖懒，卖到年三十晚，人懒我唔懒。
呢首童谣嘅主题好积极鲜明。而另外一啲童谣则钟意换个角度，通过描述懒人嘅形象，劝导细佬哥要勤力：
大食懒，起身晏，煲燶\粥，煮燶\。(《大食懒》之一)
大食懒，起身晏，洗冻水，食冷饭。(《大食懒》之二)
懒人唔中用，种蔗种生虫。种萝卜，似天冬；
种番薯，似柠檬；种菜细过芫茜葱。懒人懒人你快改，扚起心肝变条龙。(《懒人唔中用》)
无论从边个角度，呢一类童谣嘅核心主题都系一样嘅。只不过作用有几大，咁就真系要睇人啦！一个人勤力或懒惰，有个人嘅原因，亦都同佢嘅生活环境有关。而家好多家庭都只得一个细佬哥，父母长辈当佢哋就好似金笸箩一样，咩都同佢包办晒。好多本来系细路仔自己能够做嘅事，都一律由大人嚟承担！咁啲小朋友又点会唔懒呢？或者咁讲啦，系我哋啲做父母嘅太勤力，所以搞到啲下一代懒晒啰。呢样嘢，老一辈唔转变观念，唱几多童谣都唔会有效口架。
讲返我学生嘅爸爸，佢一直强调自己经常同个仔灌输要勤力读书、努力做人嘅道理。可惜个仔系左耳入右耳出，呢头誓神劈愿话要认真读书，嗰头又故态复萌唔做功课，仲诸多理由添。呢位爸爸将佢同个仔之间嘅对话演绎得不知几精彩，搞到我唔知唔觉就将佢哋嘅对话情景代入到一首童谣里面：
(父)：早起一日是一功，早起三年唔使穷。
(子)：早起三日打烂三个瓮，不如瞓到日头红！
人懒，但系佢嘅思维就未必懒。如果唔系，点会谂到咁多理由啊？
